ನೆನಪು

ಗಂಡೆನಿಸಿಕೊಂಡ ನನ್ನ
ಏನೂ, ಎಂದೂ, ಯಾವತ್ತೂ
ಬಾಧಿಸದಷ್ಟು, ನೋಯಿಸಿದ್ದು,
ನಿನ್ನ ನೆನಪು.

ನೋವು

ನನಗೂ ಗೊತ್ತು
ನೀನು ಹಗಲಿರುಳೆನ್ನದೆ ಕೊರಗುತ್ತಿರುವೆ
ಮರೆಯಲೂ ಆಗದೇ, ಮನಸೂ ಕೊಡದೇ
ನೋಯುತ್ತಿರುವೆ
ಮರೆತುಬಿಡು ಒಮ್ಮೆ ಏಕೆಂದರೆ
ಮರೆವೇ ನಿನ್ನ ನೋವ್ವಿಗೆ ಮದ್ದು.

ಮನಸು

ನೀನೇ ಬಿಚ್ಚಿಟ್ಟ ಮನಸು
ನಿನದೇ ನೆನಪುಗಳು ಅಕ್ಷರವಾಗಿವೆ ಇಲ್ಲಿ
ಈಗೇಕೆ ಮುಚ್ಚಿಟ್ಟೆ?
ಮುಚ್ಚಿದರೂ ಬೇಸರವಿಲ್ಲ
ಎಸೆಯಬೇಡ ಅಷ್ಟೇ
ಬೆಂಕಿ ಇಟ್ಟರೂ ತುಸು ಕಾಲ ಬೆಳಕಾದೀತು ಅದು.

ಕಡೆಯ ಮಾತು?

ಹೇಳಿ ಬಿಡು ಕಟ್ಟ ಕಡೆಯ ಮಾತ
ಕಾರಣವೇನೆಂದು ವಿಧಾಯಕೆ
ನಿನ್ನಂತರಾಳದ ಮಾತು ಬಿಚ್ಚಿಡು ಬೇಗ
ದೊರೆತೀತು ಬಿಡುಗಡೆ ಬಂಧನಕ್ಕೆ.

ಚಿಗುರು

ಬಾಡಲಿ ಬಿಡು
ನೀನೇ ಬತ್ತಿಸಿದ ಬಳ್ಳಿ
ಮತ್ತೆ ನೀರೆರೆಯಬೇಡ
ಆಸೆಗಳ ಹೊತ್ತು ನರಳುವಂತೆ.

ವರ್ತಮಾನ

ನಡುರಾತ್ರಿಯ ನಿದಿರೆಯಲ್ಲೂ

ಎಚ್ಚರಾಗಿರುತ್ತೇನೆ

ಏಕೆಂದರೆ

ನಿನ್ನ ನೆನಪೆಂಬ ಭಯೋತ್ಪಾದಕ

ನನ್ನ ಮನಸೂರೆ ಗೈಯ್ಯುವ ವರ್ತಮಾನವಿದೆ.

ನಿರ್ಬಂಧ

ಕಣ್ಣು ಮುಚ್ಚಿಕೊಂಡರೂ
ಕನಸಾಗಿ ಕಾಡುತ್ತಿದೆ ನಿನ್ನ ಒಡನಾಟ
ಮತ್ತಷ್ಟು ದೂರ ಸರಿ
ಕಲ್ಪನೆಗೂ ನಿಲುಕದಂತೆ.

ದೀಪ

ದೀಪಾವಳಿಯ ರಾಕೆಟ್ಟಿನಂತೆ ಬಂದ
ನಿನ್ನ ಎಸ್ಸೆಮ್ಮೆಸ್ಸು
ನನ್ನ ಬದುಕನ್ನೇ ಸುಟ್ಟು ಹಾಕಿತು.

ಹಾಗೇ ಉಳಿದ ಮಾತು

ವಿನಿಮಯಗೊಂಡಿದ್ದು ಮಿತಿಇಲ್ಲದಷ್ಟು ಮಾತು
ಬರೆದದ್ದು ನೂರಾರು ಪತ್ರ
ಹಂಚಿಕೊಂಡ ವಿಷಯಕ್ಕೆ ಲೆಕ್ಕವೇ ಇಲ್ಲ
ಆದರೂ
ಬಹುಮುಖ್ಯವಾದ ವಿಷಯ ಇನ್ನು ಹಾಗೆಯೇ ಉಳಿದಿದೆ.

ವ್ಯರ್ಥ

ಪೋನು, ಚಾಟು, ಇಂಟರ್ನೆಟ್ಟು
ಪತ್ರ, ಈಮೇಲು, ಮೊಬೈಲು
ಎಲ್ಲವೂ ನಿರರ್ಥಕವಾಗಿವೆ
ಏಕೆಂದರೆ ಅವಳು ಮೌನಕ್ಕೆ ಮೊರೆ ಹೋಗಿದ್ದಾಳೆ.

ಅವಳ ಹೆಜ್ಜೆ

ಗಂಗಾ ಯಮುನೆಯ ಜಲದಂತೆ ಬೆರೆತ ನಾವು
ಲೀನವಾಗಿದ್ದೆವು ಪ್ರೇಮ ಸಮುದ್ರದಲ್ಲಿ
ಆದರೆ ಸುಳಿವೇ ಕೊಡದೆ ಹೊರಟು ಹೋದೆ
ಬಣ್ಣದ ಮೀನಿನಂತೆ
ನಿನ್ನ ಹೆಜ್ಜೆಯ ಜಾಡನ್ನೂ ಬಿಡದೆ.

ಚಳಿಯ ನೆನಪು

ಹತ್ತಾರು ವರ್ಷಗಳಾಗಿತ್ತು
ಮೈಕೊರೆಯುವ ಚಳಿಯ ಕಹಿ ಕಂಡು
ಏಕೆಂದರೆ ಆಗೆಲ್ಲವೂ ನನ್ನ ಮಗ್ಗುಲಲ್ಲಿ
ಬೆಚ್ಚಗೆ ನೀನಿದ್ದೆ.